Die wit brood

close up photo of sliced brown bread on brown wooden tray
Photo by Marta Dzedyshko on Pexels.com

Vir een of ander onverklaarbare rede het wit brood net altyd lekkerder geproe, dis minder gesond, maar van kleins af as my ma my in die winkel na die broodrakke toe stuur, neig my hand elke keer onwillekeurig na die wittes toe. Dis die cool brode wat neerkyk op die ander brode met hul nederige, heilsame voorkoms, wat nog te sê van die brode wat nie eens gesny is nie, wat jy self deur die masjientjie moet stoot en in die sakkie toeknoop.

Dan is daar ook die bekende konnotasie van juffrouens en hul witbroodjies, die witbroodjie kind het baie ooreenkomste met die regte wit brood. Albei lyk spoggerig, netjiese snye, netjiese vlegsels en albei maak jou hart bly as jy hulle sien aankom. Die res van die klas voel maar klein en nietig in die witbroodjie se teenwoordigheid, aangesien sy tweed in bevel is in die hiërargie van die klas.

En dan is daar nog ʼn wit brood waarna verwys word wanneer iemand kla, eintlik bietjie meer spog, oor twakkies en onbenullighede wat hul lewe ondraaglik maak, dan kla jy met die spreekwoordelike wit brood onder die arm.

Om te kla is goed, maar dan moet jy eerlik kla en dit nie opdis met ʼn ander spoggerige klagte sodat jy in jou klaaglied nog steeds oulik kan lyk nie. ʼn Goeie kla-sessie kan wonders verrig en mens kilogramme ligter laat voel, dit kan selfs ʼn daaglikse aktiwiteit wees. Die doel van kla is om jou laste neer te lê en raad te vra sodat die ander persoon wat na jou klagtes luister vir jou kan help om jou swaar te herrangskik en meeste van die kere ʼn antwoord te gee waaroor jy nie baie mal is nie. Ek is lief vir kla, as ek dit klaar gedoen het voel ek ligter en terselfdertyd ook simpel, want sien my klankbord (alias Abrie) duld nie fieterjasies en verskonings nie. As ʼn klagte afgemaak word as onbenullig, moet ek dit kan sluk en daaraan werk en besef dat ek met die wit brood onder die arm loop en kla.

Dis die wonderlike oefening en uitwerking van kla. Dit word in alle eerlikheid geuiter, aangehoor en herverpak in iets heelwat ligter en meer verteerbaar. As ek nie die ligter pakkie aanvaar nie, is dit my eie skuld, maar dan mag ek nie weer kom kla nie. Eerlikheid jaag nogal baie mense weg, want almal verkies eintlik ʼn leuen om beter te voel oor ʼn situasie, dis jammer en vreemd.

Dit is jammer dat dit my so lank moes neem om agter te kom dat bruin brode eintlik die goeie brode is, hulle jok nie vir jou oor wie hulle is nie, hulle gee nie sooibrand nie en laat jou ook nie wurg nie. Ek hou van die prentjie van Jesus wat by bruin brood mense gaan sit en kuier het, die mense wat ʼn ding op sy naam noem en onbetaamlik hard kan lag. Wit brood mense weet hulle is oulik en is oorbewus van hul status en voorkoms en hoewel hulle so aanneemlik lyk, kies ons liewe Here steeds die geselskap van die bruin brode.

Om te kla met die wit brood onder arm, laat voel ʼn mens maar simpel as jy dit besef, maar solank jy dit besef. Here raas tog asseblief met my as ek kla en probeer cool lyk soos ʼn wit brood as ek kla en help my om van goeie waarde, soos ʼn bruin brood, te wees vir almal.

Amen

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.